1947.
बोलिलो ते धर्म अनुभव अंगे । काय पांडुरंगे उणे केले ॥१॥
सर्व सिद्धी पायी वोळगती दासी । इच्छा नाही ऐसी व्हावे काही ॥धृपद॥
संतसमागमे अळंकारू वाणी । करू हे पेरणी शुद्ध बीजे ॥२॥
तुका म्हणे रामकृष्णनामे गोड । आवडीचे कोड माळ ओवू ॥३॥

अर्थ :
मी जे काही धर्माचरणाविषयी बोललो आहे ते मला आलेल्या अनुभवानेच बोललो आहे आणि धर्माचरणाणे वागणाऱ्याला पांडुरंगाने कधी काय कमी केले आहे काय ? आणि त्या धर्माचरणानुसार तुम्ही जर वागलात तर सर्व रिद्धी सिद्धी तुमच्या पायी लोटांगण घेतात व तुमच्या दासी होतात परंतु त्या रिद्धी सिद्धी विषयी कोणत्याही प्रकारची ईच्छा होऊ नये असे व्हावे. संतांच्या संगतीत राहून वाणीला नाम रुपी अलंकार परिधान करून आणि त्याच नामरूपी शुद्ध बिज्याची पेरणी सर्वाच्या ठिकाणी करू. तुकाराम महाराज म्हणतात रामकृष्ण हे नाम अतिशय गोड आहे आणि आवडीने व प्रेमाने त्या नामाची माळा आपण वोऊया.