2665.
पावतो ताडन । जरी हे मोकलिते जन ॥१॥
मग मी आठवितो दुःखे । देवा सावकाश मुखे ॥धृपद॥
होती अप्रतिष्ठा । होतो वरपडा कष्टा ॥२॥
तुका म्हणे मान । होता उत्तम खंडन ॥३॥

अर्थ :
जर माझा लोकांनी त्याग केला तर मला चांगली शिक्षा मिळाली असे मी म्हणेन. जर मला असे दु:ख झाले तर मी मग देवाला सावकाशपणे आठवेन व मुखाने त्याचे नाम घेईन. जर लोकांमध्ये माझी अप्रतिष्ठा झाली आणि त्यामुळे मला कष्ट होऊन दु:ख झाले तर मला ते चांगलेच होईल. तुकाराम महाराज म्हणतात, माझा लोकांमध्ये अपमान झाला, माझा मानसन्मान होणे खंडीत झाले तर हे फारच उत्तम होईल.