723.
अनुभव खूण मी बोले साजणी ।
निरंजनी अंजन लेइले अंजनी ॥१॥
गुरुमुखे साधन जाले पै निवृत्ति ।
तत्त्वसार आपणचि जाला निवृत्ति ॥२॥
बापरखुमादेविवरा विठ्ठल कृपा चिती ।
पुंडलिका साधिले प्रेम तत्त्वार्थी ॥३॥

अर्थ :
परमात्मसुखाचा अनुभव मला आला आहे. त्याची खूण मी सांगते. ती अशी निरंजन जो परमात्मा हेच एक अंजन मी आपल्या डोळ्यांत घातले. त्याला श्रीगुरुनिवृत्तिरांयाच्या मुखांतून आलेल्या उपदेशाचे सहाय्य झाले. म्हणजे त्यांच्या उपदेशाने सारभूत परमात्मतत्त्व मीच झाले. व सर्व अनात्म धर्मापासूनही निवृत्त झाले. माझ्याचप्रमाणे माझे पिता व रखुमाईचा पती जे दयाघन श्रीविठ्ठल ते प्रेमामुळे तत्त्वार्थाने पुंडलिकासही प्राप्त झाले असे माऊली सांगतात.