43.
कुट

क्रोधाची आटी बांधोनियां पोटी । सासुरयापाठीं लागतसे ॥ १ ॥
पाहावो ईचें केवढें हालें । आल्यामधे करीतसे बोल ॥ २ ॥
सांडोनि निःशंक झाली । पांचाही बांधिली पाठीवरी ॥ ३ ॥
चांगा म्हणे जीवांचे गुज । वटेश्वरें मज सांगितले ॥ ४ ॥

44.
मुंगळावरी मुंग्यांच्या हारी । दुजनी नारी दावितसे ॥ १ ॥
मुंगी लाठी मुंगी लाठी । वैकुंठांच्या खुणा सांगतसे गोष्टी ॥ २ ॥
मुंगीच्या गळा तुळशीचा लोहदाणा । चांगावटेश्वर सांगतो खुणा ॥ ३ ॥

45.
सासूचे आधी सून जन्मली । सून मारून सासू नोवरी झाली ॥ १ ॥
आचोजीं चोजविले । तें स्वर्गी जाणवलें भाई ॥ २ ॥
पुत्र पितियाचा व्रतबंध करी । वांझ सासू कन्यादान जे नोवरी ॥ ३ ॥
सिद्धांताचे वर्म अनुभवी जाणे । वटेश्वर चांगा बोलिला खुणां ॥ ४ ॥

46.
नोवरीचे हाता चित्रिव काठी । नोवरी लागे संन्याशापाठीं ॥ १ ॥
नारायण म्हणे नारायण म्हणे । नारायण म्हणे वो नोवरीये ॥ २ ॥
विश्वस्वरूप नोवरी संन्याशा रातली । त्या आम्हा भली सोयरीक जाली ॥ ३ ॥
दिगंबर नोवरा क्षणिक वऱ्हाडी । वटेश्वरचांगा वाहतो लुगडी ॥ ४ ॥

अभंग गाथा समाप्त...