592.
ऐके तू ज्ञाना सुख विश्रांति रूपा ।
हरिरूप दीपा पाहे ऐसा ॥१॥
चित्तवृत्तीचिया आदिमध्य अंती ।
रूपीरूप आनंदी समरसे ॥२॥
निवृत्ति सांगे ज्ञाना योगाची धारणा ।
जीवशीव करणा चक्षु दृढ करी ॥३॥

अर्थ :
हे सुखाच्या विश्रांति रूपा ज्ञानदेवा, सर्व ठिकाणी ज्ञानरूपाने परमात्मा भरला आहे असे तू पहा. चित्तवृत्तीच्या आरंभी व शेवटी एकरूपाने असणारा आनंदरूप हरीच आहे. त्याच्याशी तू समरस हो. निवृत्तीनाथ ज्ञानेश्वर महाराजांना म्हणतात हे ज्ञानदेवा योगाने साध्य होणारे जे जीवेश्वराचे एकत्व त्याचे साधन जे ज्ञान ते तू आपल्या चित्तामध्ये दृढ संपादन कर. असे माऊली सांगतात.