2309.
करू जाता सन्निधान । क्षण जन पालटे ॥१॥
आता गोमटे ते पाय । तुझे माय विठ्ठले ॥ध्रु.॥
हरी दासांचा समागम । अंगी प्रेम विसावा ॥२॥
तुका म्हणे हे चि मन । इच्छादान मागतसे ॥३॥

अर्थ :
संत तुकाराम महाराज म्हणतात — तुझ्या सन्निधीला (जवळ) जाण्याचा प्रयत्न केला की क्षणात माणसाचा स्वभाव बदलतो (१); आता तुझे हे पवित्र (गोमटे) चरण मला प्रिय झाले आहेत, हे विठ्ठला (धृपद); हरिदासांचा संग झाला की अंगात प्रेमाचा विसावा येतो (२); तुकाराम महाराज म्हणतात — माझे मन हाच एक वर (इच्छादान) मागते (३).