2294.
निर्वैर व्हावे सर्वभूतांसवे । साधन बरवे हेचि एक ॥१॥
तरीच अंगीकार करिल नारायण । बडबड तो सीण येणेविण ॥धृपद॥
सोइरे पिशुन समान चि घडे । चित्त पर ओढे उपकारी ॥२॥
तुका म्हणे चित्त जालिया निर्मळ । तरि च सकळ केले होय ॥३॥

अर्थ :
या पृथ्वीतलावर जेवढे काही भूतमात्रा आहेत त्यांच्याशी वैर धरू नये एवढेच एकच साधन चांगले आहे. असे केले तरच नारायण आपला अंगीकार करील नाही तर कितीही परमार्थिक बडबड केली तरी ती व्यर्थ शिणच होईल. ज्याला सोयरे सज्जन भूतमात्र हे सर्व एकसमान म्हणजे देवा सारखेच वाटतात आणि ज्याचे चित्त परोपकार करण्यासाठी ओढ घेतात त्यांचाच नारायण अंगीकार करील. तुकाराम महाराज म्हणतात एकदा की चित्त निर्मळ झाले की सर्व केलेले कर्म सार्थकी होतात.