190.
घनु वाजे घुणघुणा । वारा वाहे रूणझुणा ।
भवतारकू हा कान्हा । वेगी भेटावा का ॥धृ॥
चांद वो चांदणे । चापे वो चंदनु ।
देवकीनंदनेंवीण नावडे वो ॥२॥
चंदनाची चोळी । माझे सर्व अंग पोळी ।
कान्हो वनमाळी । वेगी भेटवा का ॥३॥
सुमनांची सेज । शितळ वो निकी ।
पोळे आगीसारीखी । वेगी विझवा का ॥४॥
तुम्ही गातसा सुस्वरे । ऐको नेदावी उत्तरे ।
कोकिळे वर्जावे । तुम्ही बाईयांनो ॥५॥
दर्पणी पाहता । रूप न दिसे आपुले ।
बापखुमादेविवरू विठ्ठले । मज ऐसे केले ॥६॥