1373.
तुम्हा आम्हासवे न पडावी गाठी । आलेति जगजेठी कळो आता ॥१॥
किती म्हणो आता वाईटा वाईट । शिवो नये वीट आल्यावरी ॥धृपद॥
बोलिल्याची आता हेचि परचित । भीड भार थीत उडवीली ॥२॥
तुका म्हणे आली रोकडी प्रचिती । झांकणे ते किती कोठे देवा ॥३॥

अर्थ :
हे जगजेठी आता यापुढे तुमची व माझी गाठ पडू नये कारण तुम्ही कसे आहात ते मला चांगलेच समजले आहे. एखाद्या वाईट गोष्टीला किती वेळ वाईट म्हणावे, एखाद्या गोष्टीचा वीट आला असेल तर त्याला स्पर्श देखील करू नये. देवा मी तुमच्याविषयी वाईट बोलतोय कारण त्याविषयी मला अनुभव आला आहे आणि त्याच कारणामुळे मी तुमच्याशी कोणतीही भीडभाड ठेवली नाहीये. तुकाराम महाराज म्हणतात देवा तुझ्या वाईट वागणुकीची मला आता चांगलीच अनुभूती आली आहे आणि तू तुझे दुर्गुण कितीदा आणि कोठे झाकून ठेवणार आहे ?