682.
आम्ही उतराई । भाव निरोपोनि पायी ॥१॥
तुम्ही पुरवावी आळी । करावी ते लडिवाळी ॥धृपद॥
आमुचा हा नेम । तुम्हा उचित हा धर्म ॥२॥
तुका म्हणे देवा । जाणो सांगितली सेवा ॥३॥

अर्थ :
हे विठ्ठला आम्ही आमच्या हृदयातील भाव तुझ्या चरण कमलावरती अर्पण करून मोकळे झालो आहोत. आम्ही जो हट्ट प्रेमाने तुझ्या जवळ करावा, तो तू पुरवावा. आम्ही असा हट्ट करणे हा आमचा नेम आहे, आणि तुम्ही तो हट्ट पुरवावा हा तुमचा स्वभाव धर्म आहे. तुकाराम महाराज म्हणतात हे देवा तुम्ही आम्हाला जी काही सेवा सांगितली आहे ती आम्ही जाणतो आहोत.