681.
माझी विठ्ठल माउली । प्रेमे पान्हा पान्हाइली ॥१॥
कुर्वाळूनि लावी स्तनी । न वजे दुरी जवळूनि ॥धृपद॥
केली पुरवी आळी । नव्हे निष्ठुर कोवळी ॥२॥
तुका म्हणे घास । मुखी घाली ब्रम्हरस ॥३॥

अर्थ :
माझी विठाबाई माऊली माझ्या वरील प्रेमाने ती प्रेमरूपी पान्ह्याने पान्हावली आहे. ती विठाबाई मला प्रेमाने कुरवाळीत आहे, व ती विठाबाई मला जवळून एक क्षण भरही दूर करत नाही व दूर जात नाही. मी जी मागणी करत आहे ती मागणी ती विठाबाई पूर्ण करते व ती विठाबाई निष्टुर नाही ती विठाबाई अतिशय कोमल आहे. तुकाराम महाराज म्हणतात हि विठाबाई माझ्या मुखात ब्रम्ह रसाचा घास भरवत आहे.