2030.
सारावी लिगाडे धरावा सुपंथ । जावे उसंतीत हळूहळू ॥१॥
पुढे जातियाचे उमटले माग । भांबावले जग आडराने ॥धृपद॥
वेचल्याचा पाहे वरावरी झाडा । बळाचा निधडा पुढिलिया ॥२॥
तुका म्हणे जैसी दाखवावी वाणी । ते द्यावी भरोनी शेवट तो ॥३॥

अर्थ :
संसारातील सर्व भानगडी दूर सारून भक्तीसाठी चांगला मार्ग धरावा व त्याच मार्गाने हळूहळू चालत राहावे. या भक्तिमार्गा मध्ये पुढे अनेक संत गेले आहेत त्यांच्या उमटलेल्या पावलावर पाऊले देऊन त्यांच्या मागे मागे चालत राहावे नाहीतर या जगातील अनेक लोक आड रानानेच फिरत आहेत. भक्तीमार्गावर आपण चालत असताना आपल्या अंगी किती गुण आहेत किती दोष आहेत याविषयी विचार करावा त्याचा वेळोवेळी हिशोब करावा आणि या मार्गावर जो स्वतःच्या भक्तीच्या बळावर निधड्या छातीने पुढे गेला तोच खरा बलवंत आहे असे समजावा. तुकाराम महाराज म्हणतात जो जसे बोलतो तसे वागुनही दाखवतो तोच शेवटी आपले बोलणे खरे करून दाखवतो आणि तोच खरा साधक आहे.