2031.
बुद्धीमंदा शिरी । भार फजिती पदरी ॥१॥
जाय तेथे अपमान । पावे हाणी थुंके जन ॥धृपद॥
खरियाचा पाड । मागे लावावे लिगाड ॥२॥
तुका म्हणे करी । वर्म नेणे भरोवरी ॥३॥

अर्थ :
बुध्दीमंद जे लोक असतात जे मतिमंद असतात त्यांच्या माथ्यावर कामाचा खूप भार असतो आणि काही चुकल्यास त्यांच्या पदरी फजितीही पडते. तो जेथे जातो तेथे त्याचा अपमान होतो आणि त्याच्याकडून काही चूक झाली तर त्याचे नुसकान होते व त्या कारणामुळे लोक त्याच्या तोंडावर थुंकतात. अश्या त्या माणसाला खरा माल दाखवला जातो परंतु त्याला फसवून दुसरा खोटा माल दिला जातो आणि मग त्याच्या मुळे त्याच्यामागे भानगड तो स्वतःहून पाठीमागे लावून घेतो. तुकाराम महाराज म्हणतात असा मनुष्य प्रयत्न तर खुप करतो परंतु त्याला कोणत्याही गोष्टीतील खरे वर्म कळत नाही त्यामुळे त्याचा काहीच उपयोग होत नाही.