947.
अद्वैत पेठेहुनी घोंगडे आणिले ।
अमोलिक घेतले पंढरिये ॥१॥
चौ हातांची भरणी आली ।
तिये चराचरी ऐसे नाही ॥२॥
रखुमादेविवरू विठ्ठली नीट ।
पांघुरविले वैकुंठ मज देखा ॥३॥

अर्थ :
अद्वैताच्या बाजारांतून हे परमात्मरूपी अमोलिक आणलेले घोंगडे आम्ही पंढरीस घेतले. हे लांबी रुंदीला परिपूर्ण असून असे दुसरे घोंगडे चराचरांत नाही. या रखुमाईचे पती श्रीविठ्ठलानी मला हे घोगडे नीटपणे पांघरविले आहे. असे माऊली सांगतात.