2773.
कोठे देवा बोलो । तुम्हा भीड घालू गेलो ॥१॥
करावाया सत्वहाणी । भांडवलाची टांचणी ॥धृपद॥
दुर्बळा मागता । त्याच्या प्रवर्तला घाता ॥२॥
तुका म्हणे नाही । मज कळले ऐसे काही ॥३॥

अर्थ :
देवा कुठे तुमच्यासंगे मी बोलायला निघालो आणि तुम्हाला भीड घालायला निघालो आहे ? देवा मी तुमच्याशी बोलायला आणि भीड घालणे हे म्हणजे तुमचे सत्वहरण करण्यासारखेच होईल कारण तुमच्याकडे भांडवलाची फारच कमतरता आहे. देवा एखादया दुर्बळाने तुम्हाला काही मागणी मागितली तर तुम्ही त्याचा घात करण्यासाठी प्रवृत्त होता. तुकाराम महाराज म्हणतात, देवा तुम्ही असे विश्वासघातकी आहात हे मला यापूर्वी कळलेच नाही.