1962.
आम्ही बोलो ते तुज कळे । एक दोही ठायी खेळे ॥१॥
काय परिहाराचे काम । जाणे अंतरीचे राम ॥धृपद॥
कळोनिया काय चाड । माझी लोकासी बडबड ॥२॥
कारण सवे ऐका । अवघे आहे म्हणे तुका ॥३॥

अर्थ :
देवा आम्ही जे काही बोलतो ते तुला आधीच समजते कारण आपल्या दोघामध्येही तुच वास्तव्य करतोस. देवा मग तुला इतर काही परिहार देण्याचे काय काम आहे कारण तुच आमच्या अंतकरणात रहात असतोस. मी माझ्या अंतकरणातील आवड इतरांना कशाला सांगू कारण मी काही त्यांना उपदेश केला तर लोकांना ती बडबड वाटते. तुकाराम महाराज म्हणतात देवा माझे काम फक्त एकट्या तुझ्याशीच आहे बाकीच्यांशी माझी काही कर्तव्य नाही.