499.
भांडणाची रीती आयकिली संती ।
सोडवील हाती धरूनिया ॥१॥
हा काय देइल विचारी मनासी ।
येणे कोणत्यासी रोख दिल्हे ॥२॥
निवृत्तीचे हाते पावले हे तया ।
ज्ञानदेवाचिया सोई पाहे ॥३॥
वसिष्ठाचे हाते पावले श्रीरामा ।
ऐसे काय तुम्हा ठावे नाही ॥४॥
नारदाचे हाते दिधले बहुता ।
रोख नाही देता झाला कोणा ॥५॥
चांगदेवाप्रती मुक्ताईकडून ।
देवविले जाण ज्याचे त्यासी ॥६॥
बाबाजीचे हाते तुकोबाचे रिण ।
फेडविले जाण येणे खरे ॥७॥
ऐसे किती सांगो युगायुगी तुज ।
बोलियेले गुज संतसाधु ॥८॥
बहेणि म्हणे आता त्या तरी दाविजे ।
येथे रोख माझे फेडावया ॥९॥