1.
कृष्ण जन्माचे अभंग प्रारंभ

पापी जे अभक्त दैत्य ते माजले । धरणीसी झाले ओझे त्यांचे ॥१॥
दिधलासे त्रास ऋषि मुनि सर्वा । न पूजिती देवा कोणी एक ॥२॥
राहियेले यज्ञ मोडिले कीर्तन । पळाले ब्राम्हण दैत्या भेणे ॥३॥
वत्सरुपी पृथ्वी ब्रम्हयापाशी जाय । नेत्री वाहे तोय सांगतसे ॥४॥
बुडविला धर्म अधर्म झाला फार । सोसवेना भार मज आता ॥५॥
ब्रम्हा इंद्र आणि बरोबरी शीव । चालियेले सर्व क्षीराब्धीशी ॥६॥
नामा म्हणे आता करितील स्तुती । सावधान चित्ती परिसावे ॥७॥