2628.
कळो आले तुझे जिणे । देवा तू माझे पोसणे ॥१॥
वाट पाहासी आमुची । सत्ता सतत कईची ॥धृपद॥
बोलाविता यावे रूपा । सदा निर्गुणीचि लपा ॥२॥
तुका म्हणे तू परदेशी । येथे आम्हा अंगे जिसी ॥३॥

अर्थ :
देवा तुझे जगणे कसे आहे ते मला कळून आले आहे ते म्हणजे असे की तुला मी पोसणारा आहे. देवा तू सतत आमची वाट पाहात असतोस मग तुला सतत निर्गुणात राहण्याची सत्ता तरी कोठे आहे ? देवा तुला आम्ही बोलविले की तू लगेच नामरुपाला येतोस नाहीतर तू नेहमी निर्गुण स्वरुपातच लपलेला असतो. तुकाराम महाराज म्हणतात, देवा तू तर निर्गुण परदेशी आहेस परंतू आम्ही तुला बोलविले की तू लगेच सगुण होतोस आणि येथे आमच्यामुळेच तू जगतोस.