1835.
कांही सांगोनि गेले वचना | कृष्ण उपदेशी पंडुनंदना |येथे राहता पाविजे बंधना | थोर वर्तमान कलियुगी ॥१॥
या कलिमाझारी | पुत्र पित्याचे वैरी |घरची माता होय कामारी | पुरुषांते नारी अव्हेरिती ॥२॥
न येती वृक्षा फळे आटती धेनु | न पिके मही न वर्षे घनु |यापरी आटेल सकळ जनु | ऐसे जगजीवनु बोलिले ॥३॥
आणिक एक वर्तेल अपवित्र | ब्राह्मण सांडितील वेदमंत्र |आचार सांडूनि होती शुद्र | ऐसे अपवित्र कलियुगी ॥४॥
थोर वर्तमान पडेल काळु | चहु वर्णांचा होईल एकचि मेळू |कोणी कोणाचा न धरितो विटाळु | मग गोपाळु निघते जाले ॥५॥
आता वेळोवेळा सांगो किती | मोडला धर्म जाली प्रवृत्ति |विष्णुदास नामा येतो काकुळती | कैसेनि करू भक्ती पंढरीराया ॥६॥