1269.
वडील वडील आमुची बोलतील गोष्टी | परी तुज ऐसा सुष्टी देव नाही ॥१॥
दर्षना आलिया पाडिसी आव्हाटा | मन मारूनी चोहाटा भुलविसी तू ॥२॥
ऐसा कैसा कोणे केलासिरे देव | आमुच्या जाणिया खेंच आणियेला ॥३॥
माझे बाळ तुझ्या दर्शनासी आले | ते त्वा भुलविले केशिराजा ॥४॥
रात्रिदिवस तुझ्या नामाचा रे छंदु | गोविद गोविद म्हणतसे ॥५॥
तान्ह भूक विसरला पिसाट पै जाला | नोळखे मजला काय करू ॥६॥
परतोनि संसाराची सांडियेली आस | दिसतो उदास सर्वापरी ॥७॥
लोकांची लेंकुरे का गा चाळविसी | आपणया ऐसे करसी भलत्यासी ॥८॥
आणिक असता नाश वेगळा थोर | मग माझा विचार कळता तुज ॥९॥
तुज एक वर्म पुंडलिक आहे | जेणे जडविले पाय विटेवरी ॥१०॥
याहुनी आणिक अधिक पावसी | आम्हा दुबळ्यासी कष्टविंता ॥११॥
मागे पुढे तुज ऐसेंचि फावले | ते तंव न चले मजसी कांही ॥१२॥
जीव मी देईन का नामा नेईन | नाव मी करीन गोतामाजी ॥१३॥
आता बरवे विचारी अगा ये श्रीहरी | माझा सामा करी मज आधीन ॥१४॥
नाही तरी जीवित्व वेचिन तुझ्या पायी | विनविते गोणाई केशिराजा ॥१५॥