603.
देव आठवा संसार आटवा ।
पांग फिटवा तेव्हा सद्गुरूकृपा ॥१॥
ज्ञान करावे वैराग्य धरावे ।
स्वरूपा वरावे तेव्हा सद्गुरूकृपा ॥२॥
वृत्ती सोडावी निजवृत्ती जडावी ।
अखंडता घडावी तेव्हा सद्गुरूकृपा ॥३॥
मनासी दंडावे मायेसी भंडावे ।
द्वैतासी खंडावे तेव्हा सद्गुरूकृपा ॥४॥
भक्ति करावी समता धरावी ।
जाणीव सारावी तेव्हा सद्गुरूकृपा ॥५॥
असत्य त्यजावे सत्यासी भजावे ।
संतांसी पुजावे तेव्हा सद्गुरूकृपा ॥६॥
बहिणी म्हणे ऐशा निर्धारा करणे ।
तरीच वरणे सद्गुरूकृपा ॥७॥