1157.
तोचि लटिक्यामाजी भला । म्हणे देव म्या देखिला ॥१॥
ऐशियाच्या उपदेशे । भवबंध कैसे नासे ।
बुडवी आपणासरिसे । अभिमाने आणिकास ॥धृपद॥
आणिक नाही जोडा । देव म्हणविता तया मूढा ॥२॥
आणिकाचे न मनी साचे । तुका म्हणे या श्रेष्ठांचे ॥३॥

अर्थ :
जो म्हणत असेल की मी देव पाहिला आहे तर तो लबाडा चाही शिरोमणी आहे. अशा लबाड माणसाच्या उपदेशाने कसा भावबंध नाश पावेल सांगा बरे ? अभिमानाने तो मनुष्य स्वतः नरकाला जातो आणि त्याच्याबरोबर दुसऱ्यालाही नरकाला घेऊन जातो. जो स्वतःला देव समजतो अशा माणसाच्या जोडीला या जगात कोणीही नाहि. तुकाराम महाराज म्हणतात श्रेष्ठ साधुसंतांनी जरी चांगला उपदेश केला तरी हे दांभिक मनुष्य कोणालाही चांगले म्हणत नाहीत.