1649.
निजल्याने गाता उभा नारायण । बैसल्या कीर्तन करिता डोले ॥१॥
उभा राहोनिया मुखी नाम वदे । नाचे हा गोविंद नाना छंदे ॥धृपद॥
मारगी चालता मुखी नाम वाणी । उभा चक्रपाणी मागे पुढे ॥२॥
तुका म्हणे यासी कीर्तनाची गोडी । प्रेमे घाली उडी नामासाठी ॥३॥

अर्थ :
निजल्यावर जर नामस्मरण केले तर देव आपल्या शेजारी उभा राहतो आणि बसल्यावर किंवा कीर्तन करत असताना जर हरिनाम गाईले तर देव डोलत असतो. जो उभा राहून आपल्या मुखाने नारायणाचे नाम गात असतो त्याच्यापुढे गोविंद नाना छंदाने नाचत असतो. मार्गाने चालत असताना जर हरीचे नाम घेतले तर हा चक्रपाणी त्याचे रक्षण करण्याकरिता त्याच्या मागे पुढे उभा असतो. तुकाराम महाराज म्हणतात नारायणाला नामाची अवीट गोडी आहे आणि एका नामा करिता हा देवा प्रेमाने अगदी कोठेही त्वरेने धावत येतो.