1648.
आले देवाचिया मना । तेथे कोणाचे चालेना ॥१॥
हरीश्चंद्र ताराराणी । वाहे डोंबा घरी पाणी ॥धृपद॥
पांडवाचा साहाकारी । राज्याहुनि केले दुरी ॥२॥
तुका म्हणे उगेचि राहा । होईल ते सहज पाहा ॥३॥

अर्थ :
देवाच्या मनात जे आले आहे ते केल्याशिवाय देव थांबत नाही आणि तेथे कोणाचे काही चालत नाही. राजा हरिश्चंद्र आणि ताराराणी हे दोघेही राजाराणी असूनही डोंबाच्या घरी त्यांनी पाणी वाहिले. प्रत्यक्ष देवच पांडवाचा सहाय्यकारी होतात तरीदेखील देवाने त्यांना राज्यापासून वेगळे ठेवून वनात पाठविले. तुकाराम महाराज म्हणतात याकरिता शांत राहून जे काही होईल ते फक्त साक्षी रूपाने पहा.