1424.
बहुता करूनि चाळवाचाळवी । किती तुम्ही गोवी करीतसा ॥१॥
लागटपणे मी आलो येथवरी । चाड ते दुसरी न धरूनि ॥धृपद॥
दुजियाचा तव तुम्हासी काटाळा । राहासी निराळा एकाएकी ॥२॥
तुका म्हणे आता यावरी गोविंदा । मजशी विनोदा येऊ नये ॥३॥

अर्थ :
देवा आज पर्यंत तुम्ही खूप चाळवाचाळवी केली आहे पण आम्हा भक्तांना तुम्ही किती दिवस या भवसागरात गुंतून ठेवणार आहात ? देवा तुमच्या दर्शना वाचून मला दुसरी कोणतीही इच्छा नाहीये, माझा उद्धार व्हावा या कारणामुळे मी लाचार पणाने इथपर्यंत आलो आहे. तुम्हाला दुसऱ्यांचा कंटाळा आहे त्यामुळे तुम्ही एकटे एकटे राहत असतात. तुकाराम महाराज म्हणतात हे गोविंदा आता माझ्याशी चाळवाचाळवीचा विनोद करू नका एकदा मन उदार करून तुमचे दर्शन मला तुम्ही द्यावे.