3082.
आता माझ्या दुःखा कोण हो सांगाती । रखुमाईचा पति पावेचि ना ॥१॥
कायविधा त्याने घातलीसे रेखा । सुटका या दुःखा न होयचि ॥२॥
तुका म्हणे माझी विसरू नको चिंता । अगा पंढरिनाथा पाव वेगी ॥३॥

अर्थ :
आता माझ्या या दु:खाच्या प्रसंगी माझ्या सोबती कोण असणार आहे मी ज्या पाडूरंगाचा धावा केला तोच रुक्मिणीचा पती मला पावत नाही. या विधात्याने माझ्या नशिबात काय घातले आहे काय माहित या दु:खातून माझी सुटकाच होत नाही. तुकाराम महाराज म्हणतात, अहो पंढरीनाथा माझी चिंता तुम्हालाच करायची आहे हे तुम्ही विसरु नका आणि मला लवकर तुम्ही भेट दयावी.