214.
साधक बाधक न बाधी जनक । सर्व हरि एक आम्हा असे ॥१॥
हरिविण नाही हरिविण नाही । हरि हेंचि पाही एकरूप ॥२॥
हरि माझा जन हरि माझे धन । हरि हा निर्गुण सर्वांठायी ॥३॥
निवृत्ति हरिलीळा दिनकाळ फळला । निमिशोनिमिषकळा हरिजाणे ॥४॥

अर्थ:
तो हरि आमचा झाल्या पासुन अनुकुल प्रतिकुल साधक बाधकता आम्हाला बांधु शकत नाही. हरिविण दुसरे काही आम्ही पाहात नाही तोच हरि एकत्वाने आम्ही पाहतो. सर्वाठायी निर्गुण असणारा तो हरी माझे जन ही आहे व धन ही आहे. निवृत्तिनाथ म्हणतात, त्या हरिलीलेने प्रत्येक क्षणची कळा हरिमय झाली.