2506.
पुत्र जाला चोर । मायबापा हर्ष थोर ॥१॥
आता काशासाठी जोडी । हाड धांटे गुंडगे घडी ॥धृपद॥
आइते अपाहार । आणूनिया भरी घर ॥२॥
मानिली निश्चिंती । नरका जावया उभयती ॥३॥
झोडाझोडगीचे पोटी । फळे बीजे ती करंटी ॥४॥
तुका म्हणे बेटया । भांडवल न लगे खटया ॥५॥

अर्थ :
आपला स्वतःचा मुलगा जर चोर झाला तर वाईट वृत्ती असणाऱ्या आई-वडिलांना आनंद होत असतो. ते स्वत:शीच विचार करतात आता कष्ट तरी कशासाठी करायचे हात पाय दुखून तरी का घ्यायचे. कारण चोर झालेला आपला मुलगा आयते सर्व काही आपल्याला घरी आणून देऊन आपले घर भरणार आहे. मुलगा असे वाईट कृत्य करतो त्याचे त्यांना समाधान तर होतेच परंतु ते दोघेही निश्चिंत होतात, त्यांना नरकात जाणे हेच समाधान वाटते. अशा निर्लज्ज असणाऱ्या आईबापाच्याच पोटी अशी करंटी जन्माला येतात कारण जसे बीज असते तसेच फळ येते. तुकाराम महारज म्हणतात अशा खट्याळ चोरट्या मुलाला पैसा कमवण्यासाठी भांडवलच नको असते.