671.
अखंड जया तुझी प्रीति । मज दे तयाची संगति ।
मग मी कमळापति । तुज बा नानी काटाळा ॥१॥
पडोन राहेन ते ठायी । उगाचि संताचिये पायी ।
न मागे न करी काही । तुझी आण गा विठोबा ॥धृपद॥
तुह्मी आह्मी पीडो ज्याने । दोन्ही वारती एकाने ।
बैसलो धरणे । हाका देत दाराशी ॥२॥
तुका म्हणे या बोला । चित्त द्यावे बा विठ्ठला ।
न पाहिजे केला । आता माझा आव्हेर ॥३॥

अर्थ :
ज्यांना अखंड कायम तुझी प्रीती लाभली आहे मला त्याची संगती लाभू दे. आणखी दुसरे काही मागून मी तुम्हाला त्रास देणार नाही. या संताच्या पाया पुढे मी उगाचच पडून राहीन, मग काही मागणार हि नाही काही करणारही नाही. तुझी आण शपथ घेऊन मी सांगतो देवा. तुमच्या दाराशी मी धरणे धरून बसलो आहे, त्यामुळे तुम्हाला व आम्हाला पिडा होते ती नाहीशी करा. तुकाराम महाराज म्हणतात हे देवा माझ्या बोलण्याकडे लक्ष द्यावे विठ्ठला, तुम्ही माझा अव्हेर कधीही न करावा.