612.
वर्म तरि आम्हा दावा । काय देवा जाणे मी ॥१॥
बहुता रंगी हीन जालो । तरि आलो शरण ॥धृपद॥
द्याल जरि तुम्ही धीर । होईल स्थिर मन ठायी ॥२॥
तुका म्हणे सत्ताबळे । लडिवाळे राखावी ॥३॥

अर्थ :
तुझ्या भेटीचे वर्म काय आहे ते दाखव, ते वर्म मी कसे जाणून घेऊ ? विषय सुखात रंगून माझी वृत्ती हीन झाली आहे. म्हणून मी तुझ्या चरणी शरण आलो आहे. तुम्ही जर मला धीर दिला तर, तुझ्या ठायी माझे मन स्थिर होईल. तुकाराम महाराज म्हणतात तुम्ही आपल्या सत्ता बळाने माझ्या सारख्या बाळकाचे प्रेमाने रक्षण करावे.