611.
काय आह्मी आता पोटचि भरावे । जग चाळवावे भक्त ह्मुण ॥१॥
ऐसा तरि एक सांगा जी विचार । बहु होतो फार कासावीस ॥धृपद॥
काय कवित्वाची घालूनिया रूढी । करू जोडाजोडी अक्षरांची ॥२॥
तुका म्हणे काय गुंफोनि दुकाना । राहो नारायणा करुनी घात ॥३॥

अर्थ :
देवा आम्ही आता भक्तपणाचा आव आणून या भोळ्या भाबड्या माणसांना फसवून आमचे पोटच भरावे काय ? तुमचे असेच मत असेल तर मला सांगा. उगाचच आमचा जीव कासावीस होत आहे. काव्याची रचना करून आम्ही केवळ शब्दांची जोडत करत रहावे काय ? तुकाराम महाराज म्हणतात या दंभाच्या दुकानांमध्ये गुंतून राहून स्वतःचा घात करून घ्यावा काय ?