1266.
गाऊ नेणे कळा कुसरी । कान धरोनि म्हणे हरी ॥१॥
माझ्या बोबडिया बोला । चित्त द्यावे बा विठ्ठला ॥धृपद॥
मज हंसतील लोक । परि मी गाईन निःशंक ॥२॥
तुझे नामी मी निर्लज्ज । काय जनासवे काज ॥३॥
तुका म्हणे माझी विनंती । तुम्ही परिसा कमळापती ॥४॥

अर्थ :
देवा उत्तम प्रकारे कसे गावे हे मला कळत नाही परंतु तुझ्यापुढे मी दोन्ही कान धरून मी नाचत आहे. हे विठ्ठला माझ्या बोबड्या शब्दांकडे तू तुझे चित्त द्यावे, लक्ष द्यावे. माझे बोबडे शब्द ऐकून मला लोक हसतील पण मी कोणतीही शंका किंवा संकोच न करता तुझ्यापुढे तुझे गुणगान गाईन. देवा तुझे नाम घेण्यासाठी मी निर्लज्ज झालो आहे मग आता मला या लोकांशी काय काम ? तुकाराम महाराज म्हणतात हे कमलापती तुम्ही माझी विनंती एवढी ऐका.