1368.
उपजो मरो हे तो आमुची मिरासी । हे तू निवारिसी तरी थोर ॥१॥
उभा राही करी खरा खोटा वाद । आम्ही जालो निंद लंडपणे ॥धृपद॥
उभयता आहे करणे समान । तुम्हा ऐसा म्हणे मी ही देवा ॥२॥
तुका म्हणे हाती सापडले वर्म । अवघाची भ्रम फेडिन आता ॥३॥

अर्थ :
देवा जन्माला यावे आणि मरावे हीच आमची वतनदारी आहे. याचे निवारण तू केलेस तर तू थोर आहे असे मी समजेन. देवा तुला याविषयी वाद करायचा असेल तर माझ्या समोर ये आणि काय असेल ते खरा खोटा निकाल लाव. आम्ही अगोदरच निंद्य ठरलो आहोत. देवा आपण दोघेही समान आहोत त्यामुळेच मी म्हणत असतो, मी ही तुझ्या सारखाच आहे. तुकाराम महाराज म्हणतात देवा मी तुझ्यासारखाच आहे याचे वर्म माझ्या हाती सापडले आहे त्यामुळे मी आता सर्व भ्रम नाहीसा करून टाकणार आहे.