1111.
जैसे तैसे बाळ मातेसी आवडे । बोलता बोबडे शब्द गोड ॥१॥
आपुले आवडी लेववी खाववी । पाहोनिया जीवी सुख वाटे ॥२॥
तुका म्हणे काय देऊ परिहार । काय ते साचार जाणा संत ॥३॥

अर्थ :
बाळ कसे ही असो पण ते त्याच्या आईला आवडते ते बोबडे जरी बोलले तरी त्याचे बोल त्याच्या मातेला गोड वाटते. ती माता त्या मुलाला दागिने घालते, जेऊ घालते, चांगले कपडे घालते आणि त्या बाळाला पाहून तिलाच सुख वाटते, आनंद वाटतो. तुकाराम महाराज म्हणतात हे संतजन हो मीही तुमचे लाडके बाळ आहे मीही माझे बोबडे बोल बोलत आहे त्यामुळे माझे हित कशात आहे हे तुम्हीच जाणा.