1891.
संत मानितील मज । तेणे वाटतसे लाज ॥१॥
तुह्मी कृपा केली नाही । चित्त माझे मज ग्वाही ॥धृपद॥
गोविलो थोरिवा । दुःख वाटतसे जीवा ॥२॥
तुका म्हणे माया । अवरा हे पंढरिराया ॥३॥

अर्थ :
देवा संत मला मानसन्मान देतात त्यामुळे मला लाज वाटते. कारण तुम्ही अजूनही माझ्यावर कृपा केले नाही याबद्दल माझे चित्तच मला साक्ष देत आहे. मी उगाच मोठेपणा मध्ये गुंतलो त्यामुळे आता माझ्या जीवाला दुःख वाटते आहे. तुकाराम महाराज म्हणतात हे पंढरी राया आता तुम्ही तुमची माया आवरा.