3043.
तू आम्हा सोयरा सज्जन सांगाति । तुज मज प्रीति चालो सदा ॥१॥
तू माझा जिव्हाळा जीवाचा जिवलग । होसी अंतरंग अंतरीचा ॥धृपद॥
गण गोत मित्र तू माझे जीवन । अनन्य शरण तुझ्या पायी ॥२॥
तुका म्हणे सर्वगुणे तुझा दास । आवडे अभ्यास सदा तुझा ॥३॥

अर्थ :
देवा तू आमचा सोयरा सज्जन सोबती आहेस आपल्या दोघामध्ये प्रीती नेहमी असू दयावी. देवा तू माझा जिव्हाळा आहेस जिवाचा जिवलग आहेस माझ्या अंत:करणातील तू अंतरंग आहे. देवा तूच माझा गणगोत मित्र आणि तूच माझे जीवन आहेस. मी तुझ्या पायी अनन्यभावाने शरण आलो आहे. तुकाराम महाराज म्हणतात, देवा सर्व गुणाने मी तुझा दास आहे आणि नेहमी तुझाच अभ्यास करत राहाणे हेच मला आवडते.