418.
न लगे मरावे । ऐसा ठाव दिला देवे ॥१॥
माझ्या उपकारासाठी । वागविला म्हणु कंठी ॥धृपद॥
घरी दिला ठाव । अवघा सकळ ही वाव ॥२॥
तुका म्हणे एके ठायी । केले माझे तुझे नाही ॥३॥

अर्थ :
देवाने मला अशा ठिकाणी आश्रय दिला आहे की जेथे मरणच नाही. त्याचे असे माझ्यावर उपकार असल्यामुळे मी त्याला माझ्या कंठात धारण केले आहे. हरीने आपल्या पूर्णतेच्या घरी मला आश्रय दिला, त्यामुळे बाकी सर्व पोकळ वाटू लागलेले आहे. तुकाराम महाराज म्हणतात देवाने त्याचे आणि माझे असे ऐक्य केले कि तेथे माझे आणि तुझे हि भाषाच नाही.