2444.
जिकडे पाहे तिकडे देव । ऐसा भाव दे काही ॥१॥
काय केलो एकदेशी । गुणदोषी संपन्न ॥धृपद॥
पडे तेथे तुझ्या पाया । करी वाया न वजते ॥२॥
तुका म्हणे विषमे सारी । ठाणे धरी जीवासी ॥३॥

अर्थ :
देवा मी जिकडे पाहिल तिकडे मला देवच दिसावा असाच भक्तिभाव माझ्या ठिकाणी तु कृपा करून द्यावास. मी एकदेशी झालो असून देहालाच मी समजून मी गुणदोषाणी संपन्न झालो आहे. देवा मी ज्या ठिकाणी पाया पडेल तेथे तुमचे चरण असून माझे मस्तक तुमच्या चरणावर पडावे इतर ठिकाणी कोठेही माझे मस्तक पडून वाया जाणार नाही असे तुम्ही करा. तुकाराम महाराज म्हणतात देवा माझ्या जिवाला विश्वातील सारे विषमता आणि भेद नाहीसे करून तुमच्याच ठिकाणी माझ्या जीवाला आश्रय देऊन त्याचा तुम्ही स्वीकार करा.