217.
वैष्णव तो जया । अवघी देवावरी माया ॥१॥
नाही आणीक प्रमाण । तन धन तृण जन ॥धृपद॥
पडता जड भारी । नेमा न टळे निर्धारी ॥२॥
तुका म्हणे याती । हो का तयाची भलती ॥३॥

अर्थ :
ज्याची पूर्ण श्रद्धा व प्रेम विठ्ठलावर (देवावर) आहे, इतर कोणत्याही वस्तुवर नाही, तोच खरा विष्णुभक्त होय. ज्याला तन, धन, जन हे विठ्ठलासमोर तृणासमान वाटतात, ज्याला केवळ एक भगवंत (विठ्ठल) देवच मान्य आहे कोणत्याही कठिण प्रसंगी जो आपली उपासना खंडित करत नाही, तुकाराम महाराज म्हणतात, त्याची जात कोणतीही असो, तो वैष्णवच आहे.