651.
वाया जातो देवा । नेणे भक्ती करू सेवा ॥१॥
आता जोडोनिया हात । उभा राहिलो निवांत ॥धृपद॥
करावे ते काय । न कळे अवलोकितो पाय ॥२॥
तुका म्हणे दान । दिले पदरी घेईन ॥३॥

अर्थ :
हे, देवा मी वाया जात आहे. मला भक्ती व सेवा कशी करावी ते कळत नाही. आता तुमच्या पुढे हात जोडून मि निवांत उभा आहे. आणखी काय करावे ते कळत नाही म्हणून तुमचे पाय अवलोकित आहे. तुकाराम महाराज म्हणतात तुम्ही ज्या प्रकारचे दान माझ्या पदरात घालाल ते दान मी घेईन.