356.
आकाशाची गुंफा अंत नाही जिचा ।
शोध करा तिचा सर्वभावे ॥१॥
अनंत ब्रह्मांडाचा खेळ जिच्या योगे चाले ।
चांग्यासी मीनले तया ठायी ॥२॥
गुंफेच्या आधारे चंद्र सूर्य चालती ।
विश्रांतीसी येती तये जवळी ॥३॥
ज्ञानदेव नयन धरिता समभावे ।
सोहं स्वरूप भावे लाधलेसे ॥४॥

अर्थ :
जिला आकाशांची गुंफा म्हणतात. तसेच जिचा आत्मज्ञाना शिवाय अंत कळत नाही, अशी जी माया तिचा सर्वदृष्टीने शोध करा. जिच्या अधिष्ठानांवर सर्व अनंत ब्रह्माडांचा खेळ चालतो. त्या पदाला चांगले विचारवान पोहोचले. त्या मायेचा आधार जो परमात्मा त्याच्या योगांने चंद्र सुर्य चालतात व तेथेच शेवटी विश्रांती घेतात. सर्वत्र मायेचे अधिष्ठान परमात्माच भरला आहे. अशा तऱ्हेची समदृष्टी मला प्राप्त झाली. असे माऊली ज्ञानदेव सांगतात.