923.
ऐसे सुखरूप दोघे चालताती मार्गी | परी चित्त पांडुरंगी नामयाचे ॥१॥
क्षणाक्षणा वास परतोनी पाहे | वियोग न साहे पंढरीचा ॥२॥
म्हणे का गा केशीराजा मोकलिले माते | न येसीच सांगाते सांभाळीत ॥३॥
चिंतातुर थोर पडिलो ये परजनी | न दिसे माझे कोणी जिवलग ॥४॥
फुटोनी हृदय होती दोन्ही भाग | बहु मज उद्वेग वाटताती ॥५॥
तू माझी जननी तू माझा जनिता | तू बंधु चुलता पंढरीराया ॥६॥
इष्टमित्र तूंचि तूंचि गणगोत | तूंचि कुळदैवत आवडते ॥७॥
तूंचि माझे व्रत तूंचि माझे तीर्थ | तूंचि धर्म अर्थ काम देवा ॥८॥
तूंचि ज्ञानचक्षु तूंचि माझा लक्षू | तूंचि माझा साक्षु स्वभावासी ॥९॥
साच की लटिके हे माझे बोलणे | तुजवांचुनि जाणे कवण दुजा ॥१०॥
नामा म्हणे आपुले अनाथ सांभाळी | येउनी हृदयकमळी राहे माझ्या ॥११॥