2231.
चाळवणे काय । ऐसे अगे माझे माय ॥१॥
धाव पाव लवलाहे । कंठी प्राण वाट पाहे ॥धृपद॥
पसरूनि कर । तुज चालिलो समोर ॥२॥
देसील विसावा । तुका म्हणे ऐशा हावा ॥३॥

अर्थ :
हे माझे माय पांडुरंगे तु मला असे का चाळवीत आहेस? तु आता लवकर धाव मला भेट दे कारण तुझी वाट पाहता पाहता माझा प्राण कंठात आला आहे. मी माझे हात पसरून तुझ्या समोर येत आहे. तुकाराम महाराज म्हणतात कारण तु मला विसावा देशील विश्रांती देशील याच आशेने मी तुझ्याकडे येत आहे.