717.
सोळा कळी चंद्र पूर्णिमे पूर्ण बोधु ।
संतजना उद्बोधु सागरन्याये ॥१॥
नित्यता पूर्णिमा हृदयी चंद्रमा ।
अलिंगन मेघश्यामा देतु आहे ॥२॥
ज्ञानदेवा मोहो निःशेष निर्वाहो ।
रुपी रुप सोह हो एका तेजे ॥३॥

अर्थ :
पौणीमेच्या दिवसी चंद्र सोळा कलांनी परिपूर्ण झाला असता सागराला ज्याप्रमाणे भरती येते त्याप्रमाणे श्रीहरिस पाहता संतांच्या हृदयरुपी सागरास भरती येते. नित्य परिपूर्ण परमात्मा जो मेघश्याम श्रीहरि तो ज्यांच्या अंतःकरणामध्ये नित्य उदित आहे त्यास अंतःकरणवृत्ति अलिंगन देण्याकरिता सागराप्रमाणे उचंबळुन येते. माझ्या ठिकाणचा देह अहंकार व मोह निःशेष जाऊन परमात्मस्वरुपाचा सोहं भावाचा उदय झाला. असे माऊली ज्ञानदेव सांगतात.