372.
पाटी पोटी देव । कैचा हरीदासा भेव ॥१॥
करा आनंदे कीर्तन । नका आशंकितमन ॥धृपद॥
एथे कोठे काळ । करील देवापाशी बळ ॥२॥
तुका म्हणे धनी । सपुरता काय वाणी ॥३॥

अर्थ :
मागेपुढे देव असताना मग भक्तांना कसले भय आले ? म्हणूनच तुम्ही आनंदाने हरिकीर्तन करा कोणत्याही प्रकारचे भय किंवा शंका मनात धरू नका. देव आपल्या सोबत असल्यावर मग काळाचे काय सामर्थ्य चालणार आहे. तुकाराम महाराज म्हणतात आम्हाला आमचा धनी पूर्णपणे समर्थ असल्यावर आम्हाला कसली कमतरता आहे ?

373
मनोमय पूजा । हेचि पढीये केशीराजा ॥१॥
घेतो कल्पनेचा भोग । न मानेती बाह्य रंग ॥धृपद॥
अंतरीचे जाणे । आदिवर्तमान खुणे ॥२॥
तुका म्हणे कुडे । कोठे सरे त्याच्या पुढे ॥३॥

अर्थ :
मनोमन केलेली पूजा त्या केशीराजाला फार आवडते. तुम्ही कल्पनेने जरी त्याला फल पुष्प नैवद्य अर्पण केले तरी त्याला ते मान्य आहे परंतू बह्योपाचाराचा थाट-माट केला तर ते देवाला मान्य नसते. हरी हा भक्तांच्या मनातील कायम शुद्ध स्वरूपाच्या भक्तीभावपूर्वक खुणा जाणतो. तुकाराम महाराज म्हणतात पण जर अंतकरणात खोटा भक्तीभाव असेल तर त्या हरी पुढे ते कसे चालेल ?