1509.
हे का आम्हा सेवादान । देखो सीण विषमाचा ॥१॥
सांभाळा जी ब्रीदावळी । तुह्मी का कलीसारिखे ॥धृपद॥
शरणागत वैऱ्या हाती । हे निश्चिंती देखिली ॥२॥
तुका म्हणे इच्छी भेटी । पाय पोटी उफराटे ॥३॥

अर्थ :
देवा आम्ही अनेक प्रकारचे दुःख पळावे आणि त्याचे व्यर्थ शीण करत बसावे हेच तुमच्या सेवेचे दान आहे काय देवा ? तुमची ब्रीदावळी म्हणजे दीनानाथ अशी आहे ती तुम्ही सांभाळा तुम्ही कली सारखे वाईट का झालात ? तुम्हाला शरण आलेल्या भक्तांना तुम्ही काळाच्या हाती द्यावे म्हणजे वैर्‍याच्या हाती द्यावे यातच तुम्हाला समाधान वाटते काय ? तुकाराम महाराज म्हणतात देवा आम्ही तुमच्या भेटीची इच्छा धरतो आणि तुम्ही उलट वागतात पाय पोटात घेता याला काय म्हणावे ?