1435.
उदार तू हरी ऐसी कीर्ती चराचरी । अनंत हे थोरी गर्जतील पवाडे ॥१॥
तुझे लागो पायी माझा भाव पुसी जन्ममरणा ठाव । देवाचा तू देव स्वामी सकळा ब्रम्हांडा ॥धृपद॥
मागणे ते तुज मागो जीवभाव तुज सांगो । लागो तरी लागो पाया तुमच्या दातारा ॥२॥
दिसो देसी केविलवाणे तरी तुज चि हे उणे । तुका म्हणे जिणे माझे तुज आधीन ॥३॥

अर्थ :
हे हरी तू उदार आहे अशी तुझी कीर्ती चराचरामध्ये आहे. आणि हे अनंत तुझी थोरी वेदशास्त्रे, पुराणे गर्जून गात असतात. देवा माझा तुझ्या पायी एकनिष्ठ भक्ती भाव आहे त्यामुळे तू माझे जन्ममरण नष्ट करून टाक. तू देवाचाही देव आहेस सगळ्या ब्रह्मांडाचा स्वामी आहेस जे काही मागायचे असेल ते तुला आम्ही मागू व आमच्या अंतःकरणातील गोष्टी तुलाच सांगू. हे दातारा जर आम्हाला कोणाच्या पायाचा आश्रय घ्यायचा असेल तर तुझ्याच पायाचा आश्रय आम्ही घेऊ. तुकाराम महाराज म्हणतात देवा तू आम्हाला केविलवाणा दिसू देशील तर तुझाच कमीपणा यामध्ये होईल आता माझे जीने हे तुझ्या स्वाधीन आहे.