1434.
जन्ममरणांची विसरलो चिंता । तू माझा अनंता मायबाप ॥१॥
होतील ते डोळा पाहेन प्रकार । भय आणि भार निरसली ॥धृपद॥
लिगाडाचे मूळ होती पंच भूते । ज्याचे त्या पुरते विभागिले ॥२॥
तुका म्हणे जाला प्रपंच पारिखा । जिवासी तू सखा पांडुरंग ॥३॥

अर्थ :
हे अनंता तूच माझा माय बाप आहे त्यामुळे मी जन्ममरणाची चिंता करणे विसरून गेलो आहे. आता यापुढील जे काही प्रकार होतील ते फक्त पाहण्याचे काम मी करणार आहे कारण माझे भय आणि संसाराचा भार यांचा नाश झाला आहे. सर्व उपाधीचे कारण म्हणजे माझा देह आहे, आता मी पाचही तत्वा मध्ये देहाची विभागणी आपापल्या ठिकाणी केली आहे. तुकाराम महाराज म्हणतात देवा आता हा सर्व दुःखमय प्रपंच माझ्यासाठी पारीख म्हणजे परका झाला कारण तू माझा सखा झाला आहे.