171.
कांसवीची पिली करुणा भाकी । परि सांपडली निकी चरणसोय ॥१॥
कामधेनु घरी हरि माझा गोपाळ । मज काळवेळ नाठवे तैसी ॥२॥
चातका चिंतिता जरी नपवे जीवन । तरीच शोके प्राण तृषा हेतु ॥३॥
निवृत्ति स्वानंदु कामधेनु गुरु । नामाचा उच्चार तेणे छंदे ॥४॥

अर्थ:
कासवीला स्तन नसतात त्यामुळे कासवीच्या पिलानी त्याच्या चरणकमलांची याचना केली व दृष्टीतुन प्रेमपान्हा पाजायचे वरदान कासवीला मिळाले.त्यामुळे त्या हरिचरणांवर शरणागती केली तर तीच कामधेनु त्या भक्ताघरी येऊन राहते मग तो निवांत काळवेळातीत होऊन हरिभजनात लीन होऊ शकतो. चातक पक्षी जमिनीवरचे पाणी पित नाही पावसाचे पाणी पितो व तो पडलाच नाही तर शोक ग्रस्त होऊन तृषार्थ होऊन त्याचे चिंतन करतो. निवृतिनाथ म्हणतात सतत स्वानंदात राहणारी माझी गुरुमाऊली माझी कामधेनु झाल्यामुळे मी सतत नामस्मरणाचा छंद जोपासत आहे.